Cənub Qaz Dəhlizi (SGC) layihələrinin məqsədi Avropaya enerji təchizatını artırmaq və şaxələndirməkdir. Bu, Şahdəniz Qaz-Kondensat Sahəsinin İkinci Fazası çərçivəsində istehsal olunan Azərbaycan qazının Türkiyə və Avropa İttifaqına çatdırılması ilə təmin olunur.

Cənub Qaz Dəhlizi aşağıdakı dörd layihədən ibarətdir:

• Şahdəniz təbii qaz-kondensat sahəsi (SD1) və onun tam sahə inkişafı (SD2
• Cənubi Qafqaz Boru Kəməri (SCP) və onun genişləndirilməsi (SCPx layihəsi)
• Trans-Anadolu Təbii Qaz Boru Kəməri (TANAP)
• Trans-Adriatik Boru Kəməri (TAP)

SGC-nin ümumi uzunluğu 3,200 kilometrdən artıqdır.

SGC-nin təməli 20 sentyabr 2014-cü il tarixində qoyulmuşdur. SGC-nin açılışı 29 may 2018-ci il tarixində Bakıda keçirilmiş, bu koridorun vacib hissəsi olan TANAP-ın Türkiyənin Eskişehir şəhərinə olan seqmenti isə 12 iyun 2018-ci il tarixində istismara verilmişdir.

Şahdəniz-2 layihəsi çərçivəsində ilk kommersiya qazı TANAP vasitəsilə 30 iyun 2018-ci ildə Türkiyəyə çatdırılmışdır. TANAP-ın Avropa bağlantısının açılışı 30 noyabr 2019-cu il tarixində keçirilmişdir.

31 dekabr 2020-ci il tarixində TAP boru kəmərinin istismara verilməsi ilə SGC-nin birinci fazası tamamlanmış və tarixdə ilk dəfə Azərbaycan qazı Avropaya çatdırılmağa başlamışdır.

Xəzər regionunu Cənub-Şərqi Avropa ilə birləşdirən təxminən 33 milyard ABŞ dolları dəyərində mega-layihə Azərbaycan və tranzit ölkələrin iqtisadi inkişafına mühüm töhfə verir.